Қадірменді Қазақстандықтар, ата - аналар және жас ұрпақ! Сіздерді тағы бір мәрте мерекемен құттықтап, Айбатыр Сейтақ деген ақынның тамаша сөздерін жазбауға, сіздердің көкіректеріңіздегі мақтаныштарыңызды бір серпілтуге, тамаша өлең сөздерін назарларыңызға ұсынбауға қолым бармады. Әрбір қазақ осы өлеңді оқыса, ар - намысын қорғайтын Азат еліміздің нағыз азаматы болады дегенге кәміл сенемін. Әр заңның бастамасы Ата Заңнан бастау алады. Ата заңымызды мақтан тұтып, халық боп, қадір тұтып,  қастерлейік!                                                                                                                     

Азат елдің ар-намысы - Ата Заң!

Еліне арналатын тілегі шын,

Ей, ұлым – Отанымның түлегісің!

Іргесін туған елдің тіреп тұрған

Қадірін Ата Заңның білемісің?!

Ешкім де мін таға алмас елдігіме!

Дауласып жармаспайды белдігіме.

Бойында Ата Заңның өріліп тұр

Даламның кеңдігі де, теңдігі де!

Бағынған өз заңына жұмыр ғалам,

Сондықтан Күннен Жерім суынбаған.

Қоғамның сан саласын реттейтін

Әрбір заң Ата Заңнан туындаған.

Бастайтын болашаққа бақ кемені,

Осы жол халықтың да нақ сенері!

«Халқыма адалмын!» деп Ата Заңға

Елбасы қолын қойып Ант береді.

Болғанмен бұл Өмірде айлаң күшті,

Ел үшін кім тындырар қайран істі?!

Еліңнің дамуы мен дағдарысы

Ол-дағы Ата Заңға байланысты!

Нұр шашқан жас ұрпақтың ұғымына,

Тікелей өсер еткен ғұмырына

Айналды Ата Заңым мызғымайтын

Тәуелсіз мемлекеттің тұғырына!

Әр бабы, әр тармағы жойылмайды,

Шектеу де және тегін қойылмайды!

Келісім-шарт жасасқан барлық шет ел

Қазақтың Ата Заңын мойындайды!

Өмірден әділдік пен бақ табатын,

Құқығым қорғалды деп шаттанатын,

Өзіңдей жас өркендер келеді өсіп

«Бұл біздің – Ата Заң» деп мақтанатын!

Өркендеп өз қолына алған ісі,

Биікке қазағымның самға, құсы!

Халық боп қадір тұтып, қастерлеген

Ата Заң – Азат елдің Ар-намысы!

                                                                                             Айбатыр Сейтақ